Hidden

Na 2016 a aseptá un lei nobo, Lei Elektrisidat i Awa di Bebe BES. E lei akí mester pèrkurá pa un suministro di awa di bebe i elektrisidat konfiabel, pagabel i duradero na Boneiru.

E legisladó ke logra e metanan aki  ku tarifa orientá riba kosto. Esei ta nifiká: e tarifanan ku bo ta paga ta basá riba e kostonan di produkshon i distribushon di elektrisidat i awa di bebe.

E legisladó a indiká Outoridat Konsumidó & Merkado/Autoriteit Consument & Markt (ACM), komo supervisor independiente, pa kalkulá e tarifanan.

For di 1 di aprel 2018 tin un tarifa di uso fiho pa awa di bebe i for di 1 di yüni 2018 pa elektrisidat. Riba 1 di yüli 2018 a bini un tarifa di uso variabel pa elektrisidat; pa awa di bebe no a bini kambio despues di 1 di aprel 2018.

E tarifa di uso fiho ta kubri e kostonan di ret. Pues tuberia, palu di tenshon haltu, transformator, etc.

E tarifa di uso variabel ta e montante ku bo ta paga pa e kantidat di ora di kilowatt i e kantidat di meter kúbiko di awa di bebe ku bo ta usa.

Elektrisidat
Pa elektrisidat tabatin solamente un tarifa variabel. Den e tarifa ei a prosesá tur kosto di elektrisidat, tambe e kostonan di ret. Esun ku tabata usa hopi elektrisidat, tabata paga mas pa e ret ku esun ku tabata usa ménos elektrisidat, pero e ret tei pa tur hende i WEB ta hasi gastu pa mantené esaki.

Un ehèmpel:
Un hende ku pa un tempu no ta na Boneiru, pero ku sí tin un kas aki, ta paga ménos ku un hende ku henter aña ta na Boneiru. Pero e ret tei pa tur dos kliente i ta mantené esaki pa tur dos. P’esei den e Lei nobo a skohe ku tur hende ta paga un montante fiho pa luna pa e ret.

E tarifa pa Pagabon  ta konsistí di tantu un tarifa fiho i variabel. Esaki ta nifiká ku bo ta paga un montante pa kWh.

Awa di bebe
Pa awa di bebe tabatin ya kaba un tarifa básiko. Banda di esei tabatin un tarifa variabel ku tabata subi segun bo ta usa mas awa.

For di 1 di yanüari 2019 ta konta pa tur hende mes tarifa di uso variabel pa luna. Manera ya tabata e kaso ta konta un tarifa di uso fiho pa e kostonan di ret.

Lòs di e dos tarifanan aki, a bini un tarifa pa awa di bebe ku trùk. Esei ta un tarifa pa meter kúbiko di awa di bebe. Den e tarifa variabel aki tin tambe e kostonan pa e transporte ku trùk

Introdukshon di un tarifa di uso fiho i un tarifa di uso variabel ta pone ku klientenan ku un uso abou ta haña un resibu mas haltu. Esei ta konsekuensia di e tarifa di uso fiho: ta asina ku bo tin ku paga pa esaki tambe ora bo no  hasi uzo di awa di bebe òf elektrisidat.

Generalmente klientenan ku un uso haltu lo bai tin benefisio. Komo ku ta saka e komponente di kosto di ret for di e tarifa di uso variabel, e tarifa aki ta mas abou. Esakinan ta bai na e tarifa di uso fiho.

Lei Elektrisidat i Awa di Bebe BES ta ofresé dos posibilidat:

• Ministerionan di I&W (pa awa di bebe) i EZK (pa elektrisidat) den un areglo ministerial por stipulá un tarifa di uso fiho mas abou teniendo kuenta ku e grupo di kliente.

• Tambe e dos ministerionan por duna supsidio na sierto grupo di kliente ku ta pone ku e tarifa di uso fiho ta baha.

Posibilidatnan eventual fuera di Lei i pafó di stipulashon di tarifa di ACM, ta na otro partidonan gubernamental i sosial.

ACM dos biaha pa aña ta stipulá tarifanan nobo, riba 1 di yanüari i 1 di yüli. E tarifanan nobo for di e siguiente luna kontabel (pues: febrüari i ougùstùs) ta ser apliká riba e faktura.

Pa esaki ta mantené un fecha di inisio pa e uso den e luna anterior (yanüari i yüli) i un fecha final den e luna kontabel (febrüari i ougùstùs).

Pa Pagabon ta konta ku e tarifa di elektrisidat nobo ta visibel mesora for di 1 di yanüari i 1 di yüli.

Ademas ACM tambe por stipulá ku un tarifa no ta kambia. Esaki ta nifiká ku no tin kambio riba e faktura.

Den e struktura di tarifanan nobo e kapasidat di bo konekshon ta determiná altura di e tarifa di uso fiho. Mayoria kas tin un konekshon di 3×35 Ampèr. Pa esaki a hasi e tarifanan di uso fiho igual.

Pa  sobrá grupo, e úniko posibilidat pa ekonomisá ta di pidi un konekshon ku un kapasidat mas abou. E posibilidat ta dependé di bo situashon. E kapasidat di bo konekshon ta dependé di e grandura i e uso di bo instalashon.

Solamente e instaladó elektrotékniko por kontrolá si redukshon ta posibel òf si mester hasi adaptashon na e instalashon. E kostonan di esei ta pa bo propio kuenta.

Na momentu ku bo hasi adaptashon na bo instalashon, mester kùr  un kùrmentu di nobo. Despues bo por laga WEB mira e karchi di kùr ku e kapasidat di konekshon nobo. E ora ei ta pone bo den e kategoria di konekshon korekto ku e tarifa korespondiente.

Bo ta deseá mas informashon tokante di e kapasidat di konekshon di elektrisidat, sigui lesa aki.

WEB a desaroyá un instrumento di kalkulashon ku a base di e kantidat di meter kúbiko (m3) i ora di kilowatt (kWh), bo por kalkulá kiko bo tin ku paga pa awa di bebe i elektrisidat. E instrumento di kalkulashon bo ta haña aki.

E struktura di tarifanan nobo tambe ta bin ku terminologianan nobo. Un glosario di e terminologianan bo ta haña aki.