Energia duradero
Energia duradero ta wòrdu produsí for di fuentenan natural, renobabel sin generá produkto residual. Energia hidroeléktriko, bientu i solo ta e fuentenan di mas konosí ku aworaki den gran parti di mundu ta wòrdu usá. Tambe biokombustibel ta oumentando. Esei ta kombustibel prosedente di material vegetal, entre otro alga.
Boneiru tin plenitut di bientu i solo. E isla ta rondoná di un fuente di alga: laman. WEB ke integrá e fuentenan di energia importante aki den un ‘meskla di enegia’ duradero: energia di bientu, energia solar, biokombustibel i kombustibel fósil asina leu ku ta nesesario. Asina nos ta traha na un suministro di energia mas duradero posibel, pero tambe konfiabel i pagabel.
Hidden
Hidden
Energia di bientu
Bientu di Pasat ta hasi Boneiru ideal pa produkshon di elektrisidat di energia di bientu. WEB ta aspirá un uso mas haltu posibel di e koriente bèrdè aki. Si nos mester tene kuenta semper ku energia di bientu ta dependé di naturalesa: si bientu ta supla ménos por produsí ménos elektrisidat. Pa e motibu ei e sistema di produkshon di elektrisidat na Boneiru tin tantu djènereiter di disel (7) komo turbina di bientu (13).
E parke di energia di bientu na Morotin, pariba di Rincon, tin 12 turbina di bientu di kada unu 900 kW. Na Sorobon, pegá ku Lac, tin un turbina di bientu di 330 kW. Aworaki anualmente energia di bientu ta suministrá un 22 porshento di e nesesidat di energia na Boneiru. E aspirashon ta pa oumentá e proporshon di energia duradero pa 60 procent den 2025. Pa esei e produsentenan di elektrisidat ContourGlobal i WEB lo realisá un ekspanshon di e parke di mulina di bientu i un parke solar sentral na Karpata.
Energia solar
For di mart 2015 WEB tin un instalashon di prueba na Barcadera ku ta konsistí di 792 pènel solar ku ta produsí energia pa 60 kas. Ku e Piloto Solar Barcadera WEB ta investigá rendimentu i posibilidatnan pa futuro di energia solar.
Meskos ku energia di bientu, energia solar ta dependé di naturalesa: anochi no tin solo i durante produkshon di energia den dia por tin nubia. Esaki ta kousa puntonan haltu i abou ku por kousa problema den e ret di elektrisidat. Pesei ku e Piloto Solar ta investigá tambe e influensia ku distribushon di energia solar tin riba e ret di elektrisidat.
Esaki ta di importansia tambe pa kontrolá e konsekuensianan di produkshon individual di energia ku pènel solar: kompanianan i partikularnan ku ta konektá nan mes instalashon pa energia solar ku e ret di elektrisidat. Ora tin poko produkshon di energia nan por kai bèk riba e suministro di elektrisidat di WEB. Si nan ta produsí mas ku nan ta usa, ta pone e elektrisidat ku sobra riba e ret. Ku esaki ta resultá fluktuashon i instabilidat ku WEB mester dirigí den bon direkshon.
Sosionan
E kompania merikano Contour Global ta manehá e produkshon di sentral di elektrisidat na Karpata i e parke di mulina di bientu na Morotin. Na Barcadera WEB ta eksplotá un instalashon eksperimental pa energia solar. Tambe WEB ta akomodá e AlgaePARC piloto [lenk pa e di 2 proyekto aki bou] di Wageningen University & Research i sosionan Entidat Públiko Boneiru /Openbaar Lichaam Bonaire (OLB) i Fundashon Parkenan Nashonal Boneiru/ Stichting Nationale Parken (STINAPA) Bonaire. WEB ta traha den un kolaborashon estrecho ku e operadó di ret hulandes Stedin, ku ta pone disponibel su konosementu i ekspertisia pa optimalisashon di e ret di elektrisidat na Boneiru.
