Awa di berpùt
Awa di berpùt ta bin for di tankinan sèptiko i berpùt. E ta loke e nòmber mes kaba ta bisa: shushi. E no ta salú i e ta trese shushedat. Si nos rekohé i purifiká awa di berpùt na un sitio sentral, e no ta bai den nos awa di suela i tampoko den laman. Ademas nos por usé komo awa di irigashon. Asina nos ta spar awa pa bebe, nos ta keda salú i nos ta protehá e bida supmarino di Boneiru. Purifikashon di awa di berpùt ta un invershon importante den e desaroyo duradero di nos isla.
Hidden
Hidden
Rekohé awa di berpùt
Instalashon pa purifikashon di awa di berpùt (RWZI)
E área di kosta di Kralendijk tin un sistema di kloaka moderno. Pa medio di téknika di vaküm e awa di berpùt ta bai e instalashon di Awa di berpùt (RWZI) situá na Kaminda Lagun. E kapasidat di e RWZI a tene kuenta ku futuro. Un ekspanshon ta posibel pa prosesamentu te ku 2800 m3 di awa di berpùt pa dia.
Instalashon pa purifikashon di awa chikitu (AWZI)
E awa di berpùt prosedente di e tankinan séptiko i berpùt ta ser hibá ku trùk na e instalashon pa purifikashon di awa di berpùt (AWZI) situá na Kaminda Lagun.
Hidden
Hidden
Konhuntamente responsabel
Rekohé awa di berpùt ta un responsabilidat di partí di gobièrno, kasnan i kompanianan.
Konekshon riba un berpùt ta obligatorio pa kas i kompanianan den e área di berpùt. E área di kosta Hato te ku Punt Vierkant i ± 330 meter den e pais interior.
Den e áreanan indiká, òf: ‘e áreanan di obligashon di kuido, gobièrnu ta obligá pa rekohé awa di berpùt ku trùknan. Ta trata di áreanan den e área residensial den tur bario i tambe kamindanan ku ta bai Rincon i Sorobon.
Tur hende ku ta deshasí di awa di berpùt mester evitá daño na medio ambiente. Esaki ta nifiká: no susha suela, e awa den suela i e awa riba superfisie.
Tambe e ta nifiká: no tira supstansia òf produkto dañino den wc, ducha, baki di laba tayó, berpùt òf tanki séptiko.
Aki bo ta lesa (pdf) kua e supstansianan òf produktonan aki ta.
Purifiká awa di berpùt
Den e instalashonnan pa purifikashon situá na Kaminda Lagun ta purifiká e awa di berpùt na un manera biológiko: bakteria ta kome e shushedat. E prinsipio Sequence Batch Reactor (SBR) aki ta un proseso natural ku mundialmente ta ser apliká. E awa di berpùt den kuater fase ta pasa den diferente tanki. Den e tanki SBR ta regulá trabou di e bakterianan. Esaki ta sosedé via di un programa outomátiko di manda aire, meskla i sedimentá. Ta almasená e awa purifiká.
Hidden
Hidden
Yuda purifikashon natural di awa!
Supstania dañino den e awa di berpùt ta mata bakteria. Mientras ta bakteria mes mester hasi e trabou: kome shushedat! Tambe tin produkto ku por ferstòp e instalashonnan di purifikashon. E awa di berpùt mester ta liber di fèt, zeta, supstansia kímiko, tèkstil i plèstik.
Huntu nos por yuda purifikashon natural di awa. Kon?
Lesa aki (pdf) loke nunka bo mester tirá afó via baki di laba tayó, wc, ducha, tanki séptiko òf berpùt! [lenk pa pdf ku lista skemátiko, athuntá]
Bo tabata sa ku…
…hopi supstansia i produkto por tira den koi sushi?
Tuma nota si di e instrukshonnan pa kolekshon di produkto di berpùt separá!
…por entregá zeta usá gratis na Selibon?
Selibon ta buska zeta usá na kompanianan a kambio di pago i segun sita.
…kloròks ta hopi dañino?
Habon líkido i binager di limpiesa ta bon remplasante pa esaki!
…awa salu ta malu pa e proseso di purifikashon?
Sòru pa e no bai den berpùt òf tanki sèptiko.
Resiklahe
Awa di berpùt purifiká ta ser usá pa irigashon. Promé ku hasi entrega, e ta haña un tratamento mas ku lus UV. E radiashon di UV ta hasi e bakterianan inofensivo i ta optimalisá asina e kalidat di e awa di irigashon.
E awa di irigashon ahinda ta kontené fertilisante. Pesei nunka no ta uza awa di irigashon pa matanan, pero pa suela. Den suela i den rais di mata fertilisante ta keda kombertí den supstansia nutritivo pa matanan.
Tambe e asina yamá ‘lodo di kloaka’ ku ta sobra despues di purifikashon di awa di berpùt ta bon pa matanan. Ta seka e lodo i despues ta usa esaki komo fertilisante.
Sosionan
E konstrukshon di e instalashonnan di purifikashon i e sistema di kloaka a ser finansiá pa Union Oropeo i Gobièrnu di Reino. WEB ta traha huntu ku RHDHV (Royalhaskoning DHV) i Departamento di Obranan Públiko/DOW (Dienst Openbare Werken) Kòrsou. Tambe nos ta interkambiá konosementu i ekspertisio ku otro islanan den region.
Na Boneiru WEB tin un kolaborashon intensivo estrecho ku Direktorado Espasio & Desaroyo (Directie Ruimte & Ontwikkeling, DRO) i Direktorado di Supervishon & Ehekushon (Dienst Toezicht & Handhaving, DTH).
Pa entrega di awa di irigashon ku trùk di awa WEB tin un akuerdo ku fundashon Krusada. E fundashon ta yuda individuonan i famianan ku problema sosial i ta aktivo pa mas ku 20 aña na Boneiru.
Proyektonan
Seguidamente bo ta haña deskripshonnan di kantidat di proyektonan di BU Wastewater na WEB.
Hidden
Hidden
Di 9 EDF Renobashon di pipanan di awa di irigashon
Periodo: Yüli 2020 – Yüli 2021
For di e instalashon di purifikashon die awa di berpùt (RWZI) na Kaminda Lagun tin un tuberia di awa di irigashon ku ta bai sentro i e hotèlnan i komplehonan di apartamento na kosta wèst ku ta konektá riba e sistema di kloaka. WEB ta manehá e proyekto di 9 EDF: E renobashon parsial di e tuberia ku mester transportá e awa di berpùt purifiká (awa di irigashon) bèk na e hotèlnan i e komplehonan di apartamento na kosta. E trabou ta ser finansiá dor di European Development Fund, EDF (Fondo di Desaroyo Oropeo).
E renobashon ta enserá un parti di e tuberia di irigashon di Belnem te Hato. E distansia ta 11 kilometer, den área usá intensivo: e kaminda prinsipal ku ta konektá barionan residensial, aeropuerto, áreanan di hotèl i sentro di Kralendijk. E ta un bena importante nobo den e ret di RWZI. E tuberia ta garantisá entrega di awa di irigashon pa mas ku 38 konekshon di hotèl na kosta wèst.
Kolektá, purifiká i resiklá Ta importante pa Boneiru su komplehonan di hotèl i apartamento hasi uso di awa di irigashon. Awa di berpùt no prosesá ta afektá refnan di koral i no ta seif pa hende. Dor di kolekshoná awa di berpùt na un sitio sentral e no ta resultá den e awa di suela i tampoko den laman. Resiklá awa di berpùt prosesá komo awa di irigashon ta generá un ahoro signikativo pa e uso di awa pa bebe.
E di 9 EDF ta un proyekto na gran eskala i tékniko ku ta ser realisá pa i dor di Bonerianonan. WEB ta kontentu ku kolaborashon di kontratista BWM (Bonaire Wegenbouw Maatschappij), Openbaar Lichaam Bonaire (OLB)/ Entidat Públiko Boneiru. (DRO, polis, aeropuerto) i e kompanianan pa telefonia i tráfiko di data i tur ku ta estrechamente involukrá den e proyekto aki.
Di 10 EDF Ekspanshon infrastruktura di kloaka Belnem i Hato
Periodo: aprel 2021 – aprel 2022
E área di kosta di Kralendijk tin sistema operativo di kloaka ku un téknika di vaküm avansá. E di 10 proyekto EDF ta proveé un ekspanshon di e infrastruktura di kloaka na Belnem i Hato. E trabou ta ser finansiá pa European Development Fund, EDF (Fondo di Desaroyo Oropeo).
Ta bai ekspandé e sistema di kloaka na Belnem ku un stashòn di vaküm na Kaya Saturnus. Pa e konstrukshon WEB, komo supervisor di ehekushon di e di 10 proyekto EDF, a kontratá e kontratista Truckland Bonaire. E stashòn nobo lo aliviá e stashón di vaküm na Kaya Maximiliano Chiana Rosario. Ta traspasá un parti di e infrastruktura di vaküm na Belnem pa e stashón nobo. Esaki ta hasi konekshon di 173 kas riba kloaka posibel. Ta reforsá partinan di e infrastruktura di vaküm na Hato i aproksimadamente 45 konekshon di kas lo ser realisá.
Lo inisiá e proyekto den aprel 2021 i entregá den april 2022. Despues di finalisá e infrastruktura di kloaka for di Belnem te Hato lo ta kla pa ekspanshon eksistente i futuro desaroyonan. WEB Bonaire ta ehekutá e proyekto bou di enkargo di Openbaar Lichaam Bonaire (OLB)/Entidat Públiko Boneiru. Pa supervishon di e proyekto WEB ta traha huntu ku Civil Engineering Caribbean (CEC).
Téknika di Vaküm
E sistema di awa di berpùt vaküm ta usa preshon abou i atmosfériko pa transportá awa di berpùt ku un velosidat haltu. Di un tereno e awa di berpùt ta bai un pùt den e sistema di berpùt i despues e ta sigui pa un tanki di kolekshon den un stashòn di vaküm. Di einan ta pòmp e mandé pa e instalashon di purifikashon di awa di berpùt na Kaminda Lagun.
Esaki ta sosodé den un ret di tuberia será ku tin un preshon abou konstante. Tur konekshon den e sistema di kloaka ta funshoná pnumátiko (vacuum). Pues no mester di elektrisidat òf kombustibel pa esaki.
E sistema di awa di berpùt vaküm ta inteligente i futuro resistente : ekológikamente sano i kontrolá di un forma sentral riba e RWZI na Kaminda Lagun.
Entrega di awa di irigashon ku trùk di awa
Periodo: 2019 – presente
For di ougùstùs 2019 WEB tin un akuerdo ku Fundashon Krusada pa entrega di awa di irigashon. Ta trata di entrega na hotèl, kunukeronan i agrikultor ku kier usa awa di irigashon pa hardinnan i agrikultura.
Registrashon
Klientenan por aserká fundashon Krusada direktamente pa entrega di awa di irigashon. Mester registrá nan mes promé na e servisio di LVV. Esaki ta situá na Kaminda Lagun 32, telefòn 7178836.
Tambe ta tin e posibilidat pa rekohé awa di irigashon ku un trùk propio na RWZI Kaminda Lagun. Pa esaki tambe klientenan mester registrá nan mes promé.
Despues di registrashon klientenan ta haña informashon tokante e uso di awa di irigashon. Tambe ta hasi evaluashon pa wak si nan instalashon, i trùk di awa ta kumpli ku e eksigensianan pa awa di irigashon.
Gastunan
Pa entrega ku un trùk di awa dor di fundashon Krusada tin un tarifa di $7.00/m3. Esaki ta inkluí e gastunan di transporte. Entidat Públiko Boneiru i WEB ta hasi nan esfuerso pa buska posilidatnan pa redusí e tarifa aki.
Pa rekohé awa di irigashon ku un trùk di awa propio naturalmente no ta kobra gastunan di transporte. E tarifa ta $1.50/m3.
Di e manera aki WEB ta ofresé e komunidat Boneriano diferente opshon. Nos awa di irigashon ta di bon kalidat. WEB i sosionan ta aspirá disponibilidat pa mas usuario posibel .
Kolaborashon ku Krusada
Manehá un Empresa di un manera sosial responsabel (Maatschappelijk verantwoord ondernemen) (MVO) ta hunga un papel importante den kolaborashon ku fundashon Krusada. WEB konsientemente a skohe pa e kolaborashon aki i ta orguyoso ku e akuerdo. E entrega di awa di irigashon ta generá entrada pa Krusada. Ku esaki e fundashon por keda invertí den trayektonan di aprendisahe-trabou i formashon profeshonal pa su klientenan.
Tokante fundashon Krusada
Fundashon Krusada mas di 20 aña ta aktivo na Boneiru. E fundashon ta proveé guia pa (èks) adiktonan, (èks) detenidonan, hobennan i personanan ku un debilidat sosial òf físiko. Krusada tin proyektonan di trabou grandi den sektornan di metal, palu i bèrdè. E luganan di proyekto ta ser usá pa trayektonan di aprendisahe-trabou i formashon profeshonal.
