Kralendijk, 30 di ougùstùs 2026 – Water- en Energiebedrijf Bonaire (WEB) ta informá pueblo di Boneiru ku e servisio di benta di Pagabon a keda kompletamente restourá.
Djabièrnè WEB i e diferente puntonan di benta di Pagabon a eksperensiá un problema tékniko den e sistema ku ta generá tokenan di Pagabon. For di e promé momento ku e problema a presentá, téknikonan di WEB a kuminsá traha pa logra restourá e servisio.
E investigashon a mustra ku e problema tabata den e sistema suministrá pa e proveédor ku WEB ta traha kuné pa Pagabon. Pa motibu ku e solushon tékniko tabata dependé di e proveedor, i e proveedor no por a kumpli ku su obligashon di kontrakt, no tabata posibel pa WEB restourá e sistema den tempu kòrtiku.
Aunke e problema tékniko no a originá na WEB, WEB a asumí su responsabilidat pa ku su klientenan i pueblo di Boneiru. Nos prioridat tabata pa evitá, mas tantu posibel, ku klientenan ku nan saldo di Pagabon a kaba keda sin koriente miéntras e proveedor i e ekipo tékniko di WEB tabata traha riba e solushon.
Pa logra esaki, WEB a mobilisá un ekipo multidisiplinario i a implementá diferente medida di emergensia. Un number temporal di WhatsApp a keda poné disponibel pa klientenan afektá, un ekipo a keda asigná pa atendé yamadanan i mensahenan, i e kapasidat di e Servisio di Interupshon a keda ampliá ku téknikonan adishonal.
Téknikonan a sali pa asistí klientenan na nan kas i fasilitá un solushon temporal kaminda tabata nesesario. E esfuerso a envolví koleganan di diferente departamento di WEB, inkluso miembro di gerensia ku personalmente a bai riba kaya pa asistí klientenan. Tur esaki tabata parti di un esfuerso konhunto pa duna sosten na klientenan afektá te ora e sistema di Pagabon por a keda restourá.
WEB ta rekonosé ku, apesar di e medidanan aki, e interupshon a kousa inkumbiniensia i asta frustrashon pa diferente kliente. Nos ta lamentá esaki profundamente. E eksperensia di e interupshon tambe lo forma parti di e evaluashon ku WEB lo hasi huntu ku e proveedor pa traha riba medida adishonal pa redusí e riesgo i impakto di un situashon similar den futuro.
Awor ku benta di Pagabon a keda restourá, WEB lo sigui atendé e klientenan ku a risibí un solushon temporal durante e interupshon. E ekiponan di WEB lo pasa serka e klientenan afektá kaminda ta nesesario pa restourá nan situashon na e kondishon normal di promé ku e interupshon.
Klientenan ku a risibí servisio temporal i ku mester rekargá nan Pagabon por hasi esaki na e puntonan regular di benta, inkluyendo Gas Express i Van den Tweel, durante oranan regular di servisio. WEB a habri su porta nan di ofisina djasabra di 11:00 – 15:00 pa asina por a fasilita e benta di token pa Pagabon
WEB ta gradisí pueblo di Boneiru, i partikularmente e klientenan ku a keda afektá, pa nan pasenshi, komprenshon i koperashon durante e interupshon.
Nos ta gradisí tambe tur empleado ku a uni forsa pa asistí klientenan i restourá e servisio.
WEB ta keda komprometé pa suministrá un servisio konfiabel i, ora un situashon inesperá presentá, pa asumí su responsabilidat i hasi tur loke ta posibel pa asistí pueblo di Boneiru.