Kralendijk, 9 di mart 2026- Water -en Energiebedrijf Bonaire (WEB) a risibí hopi pregunta di kliente den e último dianan tokante nan resibu di koriente di febrüary 2026. Vários kliente a ripará ku nan kuenta ta mas haltu ku normal. WEB a komuniká ampliamente tokante e kambionan ku por a influensiá esaki, pa medio di kanalnan di komunikashon kustumbrá den luna di desèmber.
E montante mas haltu riba e faktura ta relashoná ku tarifanan nobo di koriente i awa di bebe ku ta na vigor for di promé di yanüari 2026. E tarifanan akí a wòrdu establesé na fin di 2025 dor di Outoridat Hulandes pa Konsumidó i Merkado (ACM). Bou di e Lei di BES pa koriente i awa di bebe, ku ta na vigor for di 2016, ACM tin e responsabilidat pa determiná tur aña e tarifanan máksimo pa produkshon i distribushon di koriente i awa di bebe na Boneiru, Saba i Sint Eustatius.
Sinembargo, hopi kliente awor ta mira e kambio reflehá riba nan kuenta, pa motibu ku e promé faktura ku tarifanan nobo a wòrdu manda na fin di febrüari. P’esei, e oumento por a parse inesperá pa algun kliente.
E ahuste di tarifa ta prinsipalmente relashoná ku un supsidio di koriente mas abou pa 2026. Esaki ta nifiká ku un parti mas grandi di e gastunan real ta wòrdu inkluí den e tarifa. Adishonalmente, e gastunan pa generá koriente i pa mantené e ret, tambe a oumentá, paso nos ta preparando pa mas kresementu na Boneiru.
E kambionan akí a resultá den gastunan fiho i e preis pa kilowatt (kWh) mas haltu, pa konsumidónan residensial i tambe pa konsumidónan grandi. Esaki ta apliká tantu pa klientenan ku un konekshon básiko komo pa esnan ku ta usa Pagabon. Pa klientenan di Pagabon, esaki ta nifiká ku e preis pa kWh a subi segun e tarifa nobo ku ta na vigor.
WEB ta komprondé ku por surgi preguntanan serka kliente na momentu ku tin gastunan mas haltu pa energia i awa di bebe. P’esei, WEB lo sigui informá klientenan na tempu tokante kualke kambio di tarifa, i lo sigui den konsulta kontinuo ku ministerionan konserní kon pa hasi energia i awa di bebe mas pagabel riba e isla.
WEB ta keda komprometé ku un ret di koriente i awa di bebe konfiabel pa Boneiru. Tambe, WEB ta traha riba ekspanshon di energia bèrdè pa redusí dependensia di petrolio den futuro pa e isla.
Klientenan ku tin pregunta tokante nan kuenta por tuma kontakto ku WEB na info@webbonaire.com. Representantenan di servisio na kliente ta disponibel pa yuda i duna mas splikashon.