Kralendijk , 13 di yüni 2025 — Kompania di utilidatnan for di islanan BES a reuní na Boneiru e siman aki pa un serie di reunionnan ku Outoridat Hulandes pa Konsumidó i Merkado (ACM), ku un enfoke prinsipal riba regulashon i polítika di tarifanan pa e añanan ku ta bin.
Representantenan di Statia Utility Company N.V. (STUCO), Sint Eustatius; Saba Electric Company , Saba; Contour Global Bonaire (CGB); i Water- en Energiebedrijf Bonaire (WEB) a partisipá na e diálogo importante aki ku ACM, kaminda tambe nan a diskutí:
- E demanda kresiente pa energia i e invershon nesesario pa infrastruktura;
- E preshon ku ta bini ku transishon energétiko;
- I preokupashon riba e redukshon di supsidio pa konsumidónan, ku por tin un impakto negativo riba e operashon i kontinuidat di servisio.
E diálogo riba tarifanan tabata e motibu prinsipal di e bishita. Pero e evento tambe a duna un oportunidat balioso pa fortalesé kolaborashon i kompartí konosementu den un ambiente mas informal.
Pa marká e okashon aki, WEB a organisá un sena kaminda e partnernan no solamente a reflehá riba asuntunan operashonal, pero tambe riba e importansia di solidaridat i kolaborashon entre e islanan.
“Aunke e enfoke tabata riba e diálogo stratégiko ku ACM, nos ta rekonosé e balor di pasa tèmpo huntu pa fortalesé relashon,” segun Joanne Nicastia, CFO di WEB Boneiru. “Elaborando riba ideanan i eksperensianan komun, nos ta traha riba un fundeshi mas fuerte pa kolaborashon duradero.”
E kompanianan di utilidatnan a reafirmá nan kompromiso pa sigui traha konhuntamente pa yega na un servisio di utilidat sostenibel i resiliente pa tur komunidat den BES.
