Kralendijk, 29 di desèmber 2023 – Den un reunion kòrtiku i informal, Water- en Energiebedrijf Bonaire N.V. (WEB) a marka e fin di nan selebrashon di 60 aniversario. Gerrit Scharrenberg, Chief Operating Officer di WEB, a presentá un donashon di $2500 na tres organisashon lokal, pa konfirmá e kompromiso di WEB pa ku e komunidat di Boneiru.
E organisashonnan ku a risibí un donashon ta; Special Olympics Bonaire, Krus Kora Bonaire i Federashon di Futbòl Bonaire (FFB). E organisashonnan aki, konosí pa nan esfuerso inkansabel i impakto positivo riba e komunidat Boneriano, a ser rekonosé pa nan trabou ekselente.
E gesto aki ta simbolisá e punto kulminante di e festividatnan ku a tuma lugá na fin di novèmber, kaminda WEB a selebrá seis dékada di servisio i kompromiso pa ku komunidat. Ku e regalonan di aniversario aki, WEB ta enfatisá su apresio i ta sostené e esfuerso kontinuo di e organisashonnan aki.
“Ku e donashon aki, nos ke ekspresá nos gratitut profundo i rèspèt pa e trabou fantástiko ku e organisashonnan aki ta hasi , pa Boneiru ta un lugá mihó pa tur hende,” Gerrit Scharrenberg a bisa durante e reunion.
Miéntras e aña ta yegando na su fin i na honor di e okashon speshal aki, henter e tim di WEB, inkluyendo tur kolega i direktiva, ta deseá tur hende na Boneiru un kambio di aña alegre i próspero.
