Kralendijk, 21 di novèmber 2025 – E kompanianan di utilidat di islanan BES (Boneiru, St. Eustatius i Saba) i islanan CAS (Kòrsou, Aruba i St. Maarten) a firma un deklarashon di intenshon pa kolaborá. Esaki ta marka un paso importante pa fortalesé e kolaborashon regional den e sektor di utilidat den Karibe.
Dia 20 i 21 di novèmber 2025, e kompanianan partisipante a reuni ku otro. E enkuentro akí ta marka e lansamentu ofisial di un evento semi-anual nobo, kaminda e kompanianan di utilidat lo diskuti desaroyo aktual, desafionan i oportunidat strategikó, manera:
- Kompra konhunto
- Inovashon
- Desaroyo teknológiko
- Kompartimentu di konosementu i desaroyo di personal
- Desaroyo den e región
E promé edishon aki a wordu fasilitá pa Water- en Energiebedrijf Bonaire N.V. (WEB). Banda di e seshonnan formal tambe tabatin tempo pa interakshon informal. Partisipantenan a haña un rekorido di e fasilidatnan operashonal, inkluyendo e planta di tratamentu di awa shushi (WWTP) i e planta di produkshon di awa di bebe, kaminda nan a haña bista balioso riba e suministro di awa i energia di Boneiru.
Dor di firma e deklarashon di intenshon aki, e kompania di utilidatnan di e islanan BES i CAS ta tumando un paso importante pa un kolaborashon mas intensivo, interkambio di konosementu, i inovashon konhunto. E aliansa aki ta forma un fundeshi fuerte pa un ret regional mas resiliente, orientá na futuro i mihó konektá.
