Kralendijk, 6 di novèmber 2025 – Water- en Energiebedrijf Bonaire (WEB) ta informá komunidat ku riba e anochi di 5 novèmber 2025, tabata nesesario pa implementá “load shedding” pa asina prevení un interupshon di koriente mas grandi.
E medida aki tabata nesesario pa motibu di un fayo tékniko den e instalashon di produkshon di Contour Global, e produktor di elektrisidat di e isla.
Dor di sera temporalmente partinan di e ret di koriente – konosí komo loadshedding – a prevení un black-out kompleto na Boneiru. Danki na e interupshon di koriente kontrolá aki, e ret a keda stabil i a evitá un interupshon mas grandi.
Contour Global i WEB ta ofresé nan diskulpa pa e posibel molèster ku esaki a kousa na abitantenan i negoshinan. Tur dos organisashon ta trahando huntu pa prevení ku un situashon semehante bolbe sosodé den futuro.
WEB Boneiru ta sigui vigilá e situashon di serka i lo sigui informá komunidat pa medio di su kanalnan di komunikashon ofisial.