Kralendijk, 13 di novèmber 2026 – Manera anunsiá anteriormente, Water- en Energiebedrijf Bonaire (WEB) lo kontinuá ku trabounan di mantenshon na e ret di elektrisidat den parti nort di Boneiru e wikènt aki, di djabièrnè 13 te ku djadumingu 15 di novèmber 2026. E chèns ku WEB lo mester deskonektá koriente temporalmente den algun bario ta mínimo. Pa por realisá e trabounan di forma sigur i redusí e chèns aki mas tantu posibel, WEB ta hasi un yamada na komunidat pa limitá nan konsumo di koriente durante e wikènt aki.
Di kiko e trabounan ta trata?
E trabounan ta relashoná ku e kabel di 30kV ku ta transportá koriente di Contour Global (CGB) pa WEB. Esaki ta un di e dos kabelnan prinsipal den nos ret di elektrisidat. E trabounan a kuminsá e wikènt pasá i, segun planifikashon, lo finalisá e wikènt aki. Na kuminsamentu di otro aña, WEB lo realisá trabounan di mantenshon na e di dos kabel.
Nos petishon na bo
Nos meta ta pa kompletá e trabounan di forma sigur, sin mester interumpi suministro di koriente den ningun bario. P’esei, WEB ta pidi tur habitante pa konsumí ménos koriente posibel durante e anochinan di djabièrnè pa djasabra i di djasabra pa djadumingu, entre 8:00 di anochi i 8:00 di mainta.
Si nos tur hasi un esfuerso pa konsumí un tiki ménos koriente, nos por kontribuí na redusí ainda mas e chèns, ku ya ta mínimo, di un interupshon temporal di suministro di koriente.
Kiko bo por hasi entre 8:00 di anochi i 8:00 di mainta?
- Èrko: Pone bo èrko algun grado mas haltu. Fria solamente e kamber ku bo ta usa i tene porta i bentana será.
- Aparatonan eléktriko: Warda te despues di 8:00 di mainta pa usa aparatonan ku ta konsumí hopi koriente, manera wasmashin, mashin pa seka paña, mashin di laba tayó, bòiler i pòmp di pisina.
- Outo eléktriko: Karga bo outo eléktriko solamente si ta realmente nesesario durante e oranan aki.
- Lus i aparatonan: Paga lusnan i aparatonan eléktriko ora bo no ta usa nan.
WEB ta komprondé ku e petishon aki ta pidi un esfuerso ekstra di komunidat, spesialmente durante e anochinan kaloroso aki. Durante e trabounan, WEB lo sigui informá komunidat tokante e progreso.
E trabounan di mantenshon aki ta importante pa sigui garantisá un suministro di koriente sigur, stabil i konfiabel pa henter Boneiru, awor i den futuro.
WEB ta gradisí komunidat pa nan komprenshon, kooperashon i kontribushon durante e trabounan aki.