Kralendijk, 27 di desèmber 2025 – Water- en Energiebedrijf Bonaire N.V. (WEB) ta anunsiá ku e tarifanan entrante promé di yanüari 2026 a keda stipulá i publiká. Debí na un redukshon den supsidionan di parti di e ministerionan, e gastunan pa elektrisidat i awa di bebe lo subi.
Kada aña, e tarifanan ku e produktor por kobra WEB i ku WEB por kobra klientenan ta keda stipulá i publiká pa Outoridat Konsumidó i Merkado
(ACM). Riba 12 di desèmber 2025, ACM a stipulá tarifanan, destiná pa kubri gastunan di WEB, ku ta drenta na vigor entrante 1 di yanüari 2026 (*).
Pa por mantené e tarifanan mas pagabel posibel, WEB ta solisitá tur aña supsidio for di e ministerionan relevante. A base di e supsidionan aki ta determiná e tarifanan pa tur kliente. Pa 2026 un kambio den e maneho a keda implementá kaminda e supsidio pa ku e tarifanan a keda fiha mas abou ku lokual a ferwagt, siendo ku WEB si mester hasi invershonnan grandi pa por akapará e kresementu grandi di demanda riba e isla. Adishonalmente, ACM despues di hasi un re-kalkulashon mester a fiha e tarifanan variabel di elektrisidat na un nivel mas haltu.
Kambio di maneho
Pa 2026, e kabinèt anterior a kambia e maneho, ku a resultá den ménos supsidio pa por mantené e tarifa fiho na Boneiru pagabel. Na 2025, WEB a logra haña supsidio èkstra, ku a pone ku e tarifa di ougùstùs 2025 tabata mas abou kompará ku yanüari 2025. En bista ku e formashon di e gabinete Hulandes nobo ainda ta den proseso, e kòmbersashonnan pa ku e maneho no por sigui.
Elektrisidat
Ministerionan a duna supsidio di koriente te ku 2025, basá riba un maneho konsistente. Pa tarifanan ku a drenta na vigor 1 di ougùstùs 2025, a proveé un supsidio suplementario pa e kategorianan di 3*50 Ampèr.
E situashon aki lo kambia entrante 1 di yanüari 2026. Ministerio di Klima i Kresementu Bèrdè (KGG) no tin sufisiente presupuesto disponibel pa mantené un maneho konsistente. Konsekuentemente, e tarifa fiho lo oumentá di 29.63 pa 47.80 pa konekshonnan ku un kapasidat te ku 3*35 ampèr.
Awa di Bebe
Un supsidio suplementario pa awa di bebe tambe a wòrdu proveé na 2025, ku a permití e tarifa pa un konekshon ku un tamaño di konekshon di ½ inch wòrdu fihá na sero, entrante 1 di ougùstùs 2025. Pa 2026, e Ministerio no tin sufisiente presupuesto disponibel pa logra un tarifa konforme e maneho di último añanan (USD 8,56 pa luna). Debí na e presupuesto limitá, e tarifa pa e konekshon aki a wòrdu fihá na USD 11.60 pa luna, entrante 1 di yanüari 2026. Konekshonnan mas grandi lo tin un oumento di 8,5 porshento.
E konsekuensianan di e kambionan den maneho di supsidionan a keda identifiká na tempu dor di WEB i a eskalá esaki na Entidat Públiko Boneiru, ku na su turno a atendé e asuntu na e nivel apropiá na Hulanda. Apesar di tur esfuerso, esaki no a kondusí ainda na e retiro òf moderashon di e kambionan di e maneho. Dia 18 di desèmber, e Kámara di Representantenan a aprobá un moshon pa investigá kon por prevení un oumentonan supstansial di tarifanan dor di duna supsidio adishonal pa e tarifanan fiho di awa i koriente. E opshonnan aki ta wòrdu eksplorá aktualmente dor di e ministerionan, i e konklushon ta ku e situashon lo no kambia promé ku 1 di yanüari 2026. WEB ta lamentá e situashon aki. Si tin presupuesto adishonal disponibel e tarifanan lo baha.
E kambionan relevante pa e tarifanan ta lo siguiente:
Tarifanan di koriente periódiko
E tarifa di uso fiho pa konekshonnan ku un tamaño di koheshon te ku 3*35 ampèr a wòrdu fiha na USD 47.80 pa luna ( esaki tabata USD 0.00 pa luna)
E tarifa di uso di koriente variabel lo oumentá di USD 0.3220 pa kWh na USD 0.3868 pa kWh. E oumento aki ta debí pa gran parti na pòst- kalkulashon dor di e produktor di elektrisidat (Contour Global Bonaire).
E tarifa pa e konekshon pre pago ( Pagabon ) a wòrdu fiha na USD 0.6062 pa kWh na 1 di Yanüari 2026 ( esaki tabata USD 0.4492 te ku 1 di ougùstùs 2025). E oumento aki ta debí na e oumento di tarifa di uso variabel i e oumento di e tarifa di uso fiho, ku ta wòrdu faktura den e tarifa aki.
Tarifanan periódiko di awa di bebe
E tarifa di uso fiho pa e konekshon (chikí) mas komun lo oumentá di USD 0.00 pa luna na USD 11.60 pa luna.
E tarifa di uso variabel lo oumentá di USD 4.055 pa m3 na USD 4.475 pa m3. E tarifanan variabel mas haltu di koriente ta hunga un ròl importante den esaki.
Pa klientenan ku tin entrega via di trùk di awa, e tarifa lo oumentá di USD 4.928 pa m3 na USD 5.377 pa m3.
Fakturashon
E tarifanan nobo periódiko di koriente i awa di bebe lo wòrdu apliká riba fakturanan kuminsando for di e periodo di konsumo na yanüari 2026. Pa klientenan ku ta usa Pagabon i servisio di trùk di awa, e tarifanan nobo lo ta visibel mesora kuminsando 1 di yanüari 2026.
(*) Dependiendo di e tendensianan di gastu di kombustibel, e tarifa di uso di koriente variabel i e tarifa di Pagabon lo keda ahustá entrante 1 di yüli 2026.
Tarifanan di konekshon di un solo biaha pa koriente i awa di bebe
E tarifanan di konekshon di un solo biaha pa konekshonnan chikí te ku 25 meter a wòrdu fihá na USD 1,853.15 pa koriente i USD 1,261.69 pa awa di bebe. Esaki ta representá un oumento di 3,3% kompará ku 2025, ku ta korespondiente ku oumento di inflashon
