Kralendijk, 22 di mei 2025 – Water – en Energiebedrijf Bonaire ( WEB) ta konsiente di e preokupashon ku tin den komunidat riba e entrega di awa di bebe via trùk di awa.
Debí na temperatura haltu, ku normal ta den luna di ougùstùs òf sèptèmber, e demanda pa awa a subi hopi pa luna di mei. Na mes momentu, un di nos trùknan tabata temporalmente for di servisio pa mantenshon planiá. Pa motibu di esaki , a surgi un retraso den entrega di awa di bebe via trùk di awa.
Nos ta spera ku tur tres trùk lo ta bèk den servisio dia 23 di mei. Nos lo amplia nos orarionan di trabou pa por eliminá e retraso ku a surgi i sirbi tur hende ku ta dependé di e servisio aki mihó.
WEB ta pidi diskulpa pa e molestiá ku por a surgi komo konsekuensia di e tardansa den entrega di awa di bebe via nos trùk di awa.
