Kralendijk, 22 dezèmber 2021, – Water- en Energiebedrijf Bonaire N.V. (WEB) ta anunsiá ku tarifanan ku ta na vigor entrante 1 di yanüari 2022 a keda stipulá i publiká.
Tur aña e tarifanan ku e produktor por kobra WEB i e tarifa ku WEB por kobra e konsumidó ta ser stipulá i publiká dor di ACM. Dia 10 di dezèmber 2021 ACM a stipulá e tarifa rendabel nan aki ku WEB por kobra su usuarionan entrante 1 di yanüari 2021.
Pa mantené e tarifanan pagabel, WEB ta hasi petishon di supsidio pa kada aña. Despues, teniendo kuenta ku e supsidionan aki, ta stipulá e tarifanan pa tur konsumidó.
Manera nos a komuniká riba 30 di novèmber 2021 e – supsidio di COVID-19 – kaminda e tarifa di uso fiho a keda supsidiá kompletamente durante 20 luna – ta terminá. Na mes momentu Ministerie van Economische Zaken en Klimaat (EZK) a pone un supsidio adishonal na disposishon pa konekshonnan mas chikitu t/k 3*50Ampère.
E kambionan ku ta relevante pa e tarifanan ta lo siguiente:
Tarifanan periódiko di koriente
E tarifa di uso fiho pa e konekshon mas komun (chikitu) ta stipulá na USD 18.71 pa luna kaminda e supsidio adishonal ta inkluí. Sin e supsidio adishonal e tarifa lo tabata stipulá na USD 28.43 pa luna.
E tarifa variabel ta subi di USD 0.2948 pa kWh na USD 0.3260 pa kWh. E subida aki ta debí na uso di un kombustibel poko mas karu pa produkshon di elektrisidat i subida drástiko di e zeta nesesario. Esaki ta kondusí na gastunan mas haltu pa e produkshon di elektrisidat na Contour Global Bonaire.
E tarifa pa konsumidó ku entrega a base di Pagabon ta subi di USD 0.2948 pa kWh na USD 0.4008 pa kWh. E subida ta relativamente haltu, teniendo na kuenta ku e supsidio di COVID-19 ta vense entrante 1 di yanüari 2022, miéntras esaki a terminá mas promé pa otro kategorianan. Banda di esei e subida di e preis di zeta tin influensia riba e tarifa aki tambe.
Tarifanan periódiko pa awa di bebe
E tarifa di uso fiho pa e konekshonnan mas komun (chikitu) ta subi di USD 7.00 pa luna na USD 7.30 pa luna.
E tarifa di uso variabel ta baha di USD 3.812 pa m3 na USD 3.735 pa m3.
Pa konsumidónan ku entrega dia di trùk e tarifa ta baha di USD 4.548 pa m3 na USD 4.503 pa m3.
Pa produkshon di awa di bebe tin mester di hopi elektrisidat. Apesar di e echo ku e gastunan pa elektrisidat ta subi, e saldo variabel di e tarifa di uso ta baha. Esaki ta posibel dor di produkshon mas efisiente di awa di bebe ku e fasilidat nobo.
Fakturashon
E tarifanan periódiko nobo pa elektrisidat i awa ta keda apliká riba e fakturanan ku periodo di uso ku fecha di inisio na yanüari 2022. Pa konsumidónan a base di Pagabon i trùk di awa ta konta ku e tarifanan nobo ta visibel dirèkt for di 1 di yanüari 2022.
(*) Entrante 1 di yüli 2022 – dependiendo di e desaroyonan di kombustibel – e tarifa di uso variabel pa elektrisidat i e tarifa di Pagabon lo ser stipulá di nobo.
Tarifanan di un solo biaha pa konekshon di elektrisidat i awa
Tarifanan di un solo biaha pa konekshon, pa konekshonnan chikitu te ku 25 meter, ta stipulá riba USD 1.578,64 pa elektrisidat i USD 1.074,79 pa awa di bebe. Esaki ta un subida di 4,3% kompará ku 2021.
E tabel ke e tarifanan nobo di elektrisidat i awa di bebe ku ta konta for di 1 di yanüari 2022 ta riba www.webbonaire.com.
