Kralendijk, 12 di òktober 2026 – Water -en Energiebedrijf Bonaire (WEB) i Israel Desalination Engineering (IDE Technologies) a firma un akuerdo di koperashon nobo.
E akuerdo ta konta pa un periodo inisial di te ku sinku aña. E firmamentu a tuma lugá na e planta di produkshon di awa di bebe di WEB na Hato, den presensia di invitadonan anera e tim di proyekto, empleadonan di BU-Water miembro du hunta di komisarion i representantenan di tur dos organisashon i prensa
WEB Boneiru tin algun tempu kaba ta kolaborá ku IDE. Te awor, e kolaborashon aki tabata konsistí di proyektonan separá. Ku e marko pa akuerdo nobo aki, ámbos partido lo kolaborá riba un eskala mas grandi i mas amplio pa loke ta trata desaroyo, diseño i realisashon di ekspanshonnan den futuro i renobashonnan di produkshon di awa di bebe na Boneiru.
Mas awa di bebe pa un isla ku ta krese
Boneiru ta krese rápidamente, i huntu ku esaki, e demanda pa awa di bebe ta oumentá. Den e último añanan, e demanda a subi ku mas di 10% pa aña. Na 2021, WEB a tuma kontrol kompleto di produkshon di awa di bebe ku konstrukshon di un instalashon nobo pa produkshon di awa. Ku e promé ekspanshon di 5.600 m³ pa dia, e kapasidat total di produkshon a alkansá 7.200 m³ pa dia. Na 2024, e instalashon a wòrdu ekspandé ku 2.400 m³ adishonal pa dia, hibando e kapasidat aktual na 9.600 m³ pa dia.
Sinembargo, Boneiru ta sigui krese. P’esei, WEB tin intenshon di oumentá e kapasidat na 14.400 m³ pa dia durante e próksimo kuater añanan. Esaki ta nifiká ku e kapasidat di produkshon ta bira dos biaha mas tantu kompará ku 2021.
Pa realisá e kresementu aki na un manera manehabel i dirigí riba futuro, WEB a opta, for di 2019, pa hasi uso di ekspanshon modular. Dor di ekspandé kapasidat paso pa paso, usando mòdulnan separá, WEB por respondé rápido na e demanda kresiente pa awa di bebe i kuidadosamente por hasi invershonnan nesesario ku desaroyo di Boneiru.
E awa di bebe ta traha di awa di laman. WEB ta saka e salu for di e awa di laman usando osmosis reverso.Den e proseso aki, awa di laman ta pasa bou di preshon haltu dor di membrananan hopi fini ku ta retené e salu, lagando solamente awa pasa.
WEB ta hasi esaki na un manera sostenibel. Na 2019, WEB a disidí ku produkshon di awa di bebe mester ta kompletamente liber di uso di kímiko. E membrananan no ta wòrdu limpiá ku kímikonan, sino ta wòrdu mantené limpi mekánikamente. Komo resultado, no ta usa kímikonan ku por hasi daño na bida bou di laman. Banda di esaki, WEB ta eksplorá kontinuamente oportunidatnan pa sigui mehorá sostenibilidat di e proseso di produkshon i redusí konsumo di energia.
Kiko tin riba agènda?
Ademas di amplia e kapasidat di osmosis reverso, otro komponentenan di produkshon di awa di bebe tambe lo wòrdu renobá i ekspandé den e próksimo añanan. Esaki ta inkluí:
- Ekspanshon di kapasidat di osmosis reverso na Hato, loke lo permití WEB pa produsí mas awa di bebe.
- Renobashon i ekspanshon di post-tratamentu. Durante e último paso aki, e awa produsí ta haña e komposishon i kalidat korekto promé ku e wòrdu entregá na klientenan komo awa di bebe.
- Renobashon i ekspanshon di e instalashon pa saka awa for di laman i sistema di drenahe ku ta bai bek laman. Awa di laman ta wòrdu hiba via e entrada pa produkshon di awa di bebe. E sobra di awa salu konsentrá ta wòrdu debolbé na laman via e sistema di drenahe.
- Otro trabounan nesesario pa permití ku suministro di awa di bebe por krese huntu ku e desaroyo di Boneiru, inkluyendo modifikashon i ekspanshon di pipanan i otro infrastruktura.
Kaminda ta posibel, WEB ta kolaborá ku kompanianan lokal riba e trabounan aki.
Produkshon sostenibel di awa di bebe ta krese huntu ku Boneiru
Huntu ku IDE, WEB ta ekspandé produkshon di awa di bebe paso pa paso, usando e hasiendo uso di ekspanshon den diferente fase. Na mes momentu instalashonnan eksistente ta wòrdu renobá kaminda esaki ta nesesario.
