Kralendijk 2 Aprel 2026- Water -en Energiebedrijf Bonaire (WEB) ta informá públiko ku entrega di awa di bebe via trùk di awa aktualmente ta eksperensia problemanan tékniko, loke a kousa retraso pa klientenan ku ta dependé di e tipo di entrega aki.
Pa motibu di problemanan logístiko, e piesanan esensial ku ta nesesario pa drechá e trùknan di awa ta tardando mas di lokual ku a spera pa yega Boneiru. Komo resultado, no ta tur trùk di awa ta operashonal na e momentu aki.
Aktualmente, WEB ta sigui hasi entrega di awa ku un trùk di awa ku un kapasidat di 8 m³ (8.000 liter), loke ta resultá den tempu di entrega mas largu ku normal. Nos timnan ta trahando duru, pa sigui duna e servisio di e mihó manera posibel i pa minimalisá e molèster pa nos klientenan.
Pa garantisá e kontinuidat di servisio, koleganan lo traha durante dianan di fiesta, pa por yega na tur kliente ku ta dependé di entrega di awa via trùk pa nan suministro di awa.
WEB ta spera di por risibí un trùk di awa nobo pa fin di e luna aki. Pa e tempu ei, e otro trùk di awa tambe lo ta kompletamente drechá, loke ta fortalesé nos kapasidat pa kumpli ku e demanda kresiente pa entrega di awa via trùk.
Nos ta ofresé nos diskulpa pa kualkier inkumbiniensia ku e situashon aki por a kousa. Nos ta sigurá komunidat i tur kliente ku ta dependé di entrega di awa via trùk di awa ku e situashon aki tin nos atenshon i ta trahando duru pa solushoná e situashon aki.
