Kralendijk, 22 di òktober 2025 – Awe mainta pa 7:46 AM, a detektá un interupshon di koriente na Boneiru, ku a resultá den un blackout, lagando henter e isla sin koriente.
E tim di Water- en Energiebedrijf Bonaire (WEB) mesora a drenta akshon i, huntu ku téknikonan di ContourGlobal Boneiru (CGB), a lansa un investigashon riba e kousa di e interupshon. Mesora a inisiá inspekshonnan i kòntròlnan di seguridat pa prevení mas daño i permití un restart sigur di e ret di koriente.
E resultadonan inisial ta indiká ku e interupshon probablemente tabata kousa pa un insidente di produkshon, pero e investigashon ta andando. Tantu WEB komo CGB ta hasiendo mas inspekshon i análisis tékniko awe pa determiná e kousa i progreso eksakto di e interupshon.
E prioridat di ámbos tim tabata pa restourá koriente na un manera sigur i kontrolá. E proseso aki a wòrdu realisá den fase, servisionan esensial manera Hospital Mariadal, e departamentu di bombero i polis a restourá koriente promé. Poko despues, e resto di e isla a wòrdu rekonekta gradualmente na e ret.
Durante e proseso di restourashon, a bolbe sosodé un interupshon temporal den Centrumgebied. Téknikonan di WEB a traha duru pa restourá koriente na e área aki.
Pa 3:20 PM, tur kliente tabatin koriente restourá. WEB lo informá públiko asina ku tin mas informashon.
________________________________________________________________