Kralendijk, 30 di òktober 2026 – Water- en Energiebedrijf Bonaire (WEB) lo hasi trabounan di mantenshon riba e ret di transmishon di 30kV den parti nort di Boneiru, for di 6 te ku 15 di novèmber 2026. E trabounan lo tuma lugá riba djabièrnè, djasabra i djadumingu entre 10:00 pm i 08:00 am.
Mantenshon pa un suministro di koriente konfiabel
Durante e periodo aki, WEB lo ehekutá trabou di mantenshon na diferente parti di e ret di transmishon di 30kV i lo reemplasá un gran parti di e konekshonnan di kabel (moffen). E konekshonnan di kabel (moffen) ta garantisá un konekshon sigur entre diferente parti di un kabel di elektrisidat. E trabounan aki ta nesesario pa garantisá e konfiabilidat di suministro di elektrisidat den e trayekto aki i pa garantisá siguridat di suministro di energia na Boneiru.
Preparashon kuidadoso
WEB i e kontratistanan envolví ta tuma medidanan amplio di siguridat pa garantisá ku e trabounan ta wordu ehekutá di forma sigur pa empleadonan i usuarionan di kaminda den e besindario kaminda e trabou ta tuma luga.
E posibel riesgonan a wordu identifiká di antemano. E áreanan di trabou lo wordu indiká klaramente, i solamente personal outorisá lo tin akseso na e áreanan aki.
Kiko bo por spera?
WEB no ta premirá ningun interupshon den suministro di koriente durante ehekushon di e trabounan. Sin embargo, apesar di tur e medidanan di prekoushon, no por ekskluí kompletamente e posibilidat di un interupshon.
Si akaso nos keda konfrontá ku un interupshon, WEB lo informá e komunidat mas pronto posibel via di su kanalnan habitual di komunikashon.
Durante e trabounan, residentenan den bisindario i usuarionan di kaminda por eksperensiá inkonvenensia of molèster debí na trabounan na kant’i kaminda, tráfiko di vehíkulonan di trabou i un presensia mas grandi di empleadonan na e lugánan di trabou.
WEB lo hasi tur esfuerso pa limitá e inkonvenensianan aki mas tantu posibel i pa ehekutá e trabounan di forma sigur i efisiente.
Si akaso eksperensiá algun molèster, bo por tuma kontakto ku WEB via di e number di telefòn di interupshon 9215.
WEB ta gradisí pueblo di Boneiru pa nan komprenshon durante e trabounan di mantenementu aki.