Kralendijk, 28 di ougùstùs 2023 – E kalor eksesivo di último dianan ta hisa e demanda na nivelnan sin presedente i ta poniendo e suministro di koriente bou di preshon.
Awor ku nos ta drentando e temporada di mas kalor di aña, e orkannan ta mas aktivo i ta sigui oumentá. Irónikamente konsekuensianan di vários orkan resientemente ta kondusiendo na velosidat di bientu hopi abou riba e isla, redusiendo e kantidat di koriente ku por produsí na e molinanan di bientu na Morotin. Den kombinashon ku e demanda máksimo pa èrko, e situashon di suministro di koriente na Boneiru a bira un desafio úniko.
Water- en Energiebedrijf Bonaire (WEB) i ContourGlobal Bonaire (CGB) ta trahando duru pa garantisá kontinuidat di suministro di koriente pa e isla durante e periodo di e demanda imprevisto. Ounke e organisashonnan no ta spera ku e suministro lo redusí, den peor kaso, sierto áreanan lo keda deskonektá si e demanda surpasá e kapasidat ku ta generá. Lo realisá deskonekshon segun orario i sekuensia predefiní.
Nos ta pidi tur hende pa konsiderá uso di koriente i kaminda ku ta posibel redusí uso mas tantu posibel durante e temporada aki:
- Paga lus i saka aparato elektróniko for di koriente na momentu ku no ta usando esakinan
- Kontrolá si bo pera di lus ta energétikamente efisiente, si no ta e kaso, kambianan pa esnan mas efisiente/LED
- Ahustá konfigurashon di tèrmostat pa redusí kostonan di èrko dor di sigurá ku e temperatura paden (23˚C) su diferensia ku esun pafó (33˚C) no ta mas ku 10 grado. Poniendo bo èrko na un temperatura mas abou lo resultá tambe den un faktura di koriente mas haltu.
Dor di hasi esakinan bo por yuda na mantené e suministro di koriente pa tur kliente i redusí bo faktura di koriente na fin di luna.
CGB ta sigui invertí den produkshon di energia renobábel i konvenshonal for di 2019 a invertí, $41 mion i agregá 15 MW di produkshon di elektrisidat inkluyendo un parke solar i un total di 14 MW/ 14 MWh di sistema di almasenamentu di bateria.
Pa kumpli ku e demanda kresiente riba e isla di Boneiru, CGB ta aselerando invershonnan nobo pa agregá 4MW adishonal di generashon térmiko na fin di 2023.
Tambe CGB ta planiando pa den 2024 aselerá remodelsahon di e parke di Molina di bientu na Morotin pa agregá konsiderablemente mas kapasidat i pa agregá 6MW kapasidat firme adishonal.
Danki pa bo komprenshon i koperashon.
