Kralendijk, 22 yüni 2023 – Tarifanan di elektrisidat variabel ta baha ku USD 0.0554 pa kWh entrante 1 di yüli 2023. Esaki ta resultado di redukshon di kombustibel pa produkshon di elektrisidat. E bahada ta konta pa e tarifa di uso variabel i pa e tarifa di Pagabon.
E gastunan di kombustibel ku Contour Global Bonaire (CGB) ta hasi pa produkshon di elektrisidat, ta ser kalkulá i pasá sin margen pa e usuarionan di Water- en Energiebedrijf Bonaire (WEB). E preis di kompra pa e kombustibel aki a baha ku 19% kompará ku e tarifa di 1 di yanüari 2023.
Pa protekshon di e konsumidó e tarifanan ta ser stipulá dor di Autoriteit Consument en Markt (ACM) a base di Lei Elektrisidat i Awa di Bebe BES. Desaroyonan di gastu por kondusí na un ahuste di e tarifa di uso variabel 2 biaha pa aña, riba 1 di yüli i 1 di yanüari. ACM a desaroyá un modèl pa e ahustenan aki di kua e resultado – un bahada di USD 0.0554 pa kWh entrante 1 di yüli 2023 – a ser stipulá riba 8 di yüni 2023.
A base di esakinan entrante 1 di yüli 2023 e siguiente tarifanan nobo pa elektrisidat variabel ta na vigor:
Tarifa di uso variabel (post pago): USD 0.3516 pa kWh
Tarifa di Pagabon (pre pago): USD 0.3516 pa kWh
E kambio di e tarifa lo ta visibel riba e fakturanan ku periodo di uso ku fecha di inisio pa uso den yüli. Pa konsumidónan pre pago (Pagabon) e ahuste lo ta dirèkt visibel for di 1 di yüli 2023. E tarifa ( kompletamente supsidiá ) di uso fiho no ta ser adaptá 1 di yüli 2023.
