Kralendijk, 17 di mei 2023 – Water- en Energiebedrijf Bonaire (WEB) ta informá komunidat di Boneiru ku riba dia 15 di mei a firma un kontrato ku e kompania IDE Water Technologies Ltd. (IDE) pa ekspanshon di nos planta di awa na Hato.

 

E kontrato ta pa agregá dos unidat di Sea Water Reverse Osmosis (SWRO) ku ta kombertí awa di laman den awa pa bebe. Kada un di e unidatnan aki tin un kapasidat di 1,200m3 pa dia. E kontrato aki yama ofisialmente “Design and Construction Work of Waterplant extension 2 x 1.200m3/day pre-treatment, desalination- Design, Engineering, installation”. Esaki ta enserá pues ku e kontratista mes ta responsabel pa diseñá i konstruí e dos unidatnan.

 

Kapasidat di produkshon di awa dushi:

Aktualmente nos planta na Hato ta produsí 7,200 m3 di awa pa dia. Ora e ekspanshon ta kla, WEB lo por produsí 9,600m3 di awa pa dia. For di dia ku a tuma e planta di awa den operashon na 2021, WEB a tene kuenta ku den futuro lo mester sigui ekspandé e planta pa asina por sigui kumpli ku e kresementu di ekonomia i komunidat Boneriano. Den WEB su plan di maneho pa tempu largu i presupuesto di 2023, a inkorporá e ekspanshon di planta aki.

 

IDE:

Na 2021 WEB mes a kuminsa operá e planta di produkshon di awa na Hato. E planta aki ta konsistí aktualmente di sinku (5) di e unidatnan di desalinisashon di e kompania di teknologia di desalinisashon IDE, ubiká na Israel. WEB a selektá IDE komo parti di e proseso di kontratashon pa ekspanshon di e planta di awa.

 

Planifikashon di trabou:

E kontratista pronto lo kuminsa ku e trabounan i e intenshon ta pa WEB tuma e unidatnan den produkshon medio 2024.