Kralendijk, 23 di yüni 2022 – Gerensia di Water- en Energiebedrijf Bonaire (WEB) a presentá e relato finansiero, deklarashon di accountant i relato anual na “Openbaar Lichaam Bonaire” (OLB). OLB komo akshonista di WEB a konfirmá e relato finansiero. E relato anual ta duna un bista di e situashon na 2021 segun echo, sifra i splikashonnan.
2021 tabata un aña emoshonante i eksitoso pa WEB. Apesar di tur kresementu riba e isla, WEB a logra realisá tur proyektonan planiá i finalisá esakinan den e tempu stipulá i segun presupuesto.
Entrega i operashon di planta di awa nobo
Na òktober 2021 WEB a selebrá inougurashon di planta di awa nobo. Ku esaki WEB despues di hopi aña ta produktor di awa di bebe na Boneiru. E planta di awa nobo tin un konsumo di energia mas abou ku su antesesor. Pa produkshon di awa no ta hasi uso di produktonan kímiko.
Entrega i operashon di tanki di awa na seru Largu
Na 2021 a konstruí un tanki di awa nobo na Seru Largu ku un kapasidat di 5000m3. Ku esaki Boneiru tin un almasenamentu di awa di 25.500m3.
Reparashon di e liña di awa
Na 2021 WEB a realisá reparashon i a reforsá liñanan di distribushon di awa. E trabou tabata inkluí un tuberia di preshon nobo di Hato pa Seru Largu i un tuberia prinsipal di Seru Largu pa Kaya Maria Carmen Hellmund.
Entrega proyekto di 9 EDF: reparashon liña di irigashon i planta di tratamentu di awa di kloaka
Den koperashon ku OLB, SONA (“Stichting Ontwikkeling Nederlandse Antillen”) i “MNO Vervat”, WEB a realisá di 9 proyekto ku finansiamentu di EDF (“European Development Fund”) na 2021. A hasi reparashon di e liña di irigashon kompletamente i reparashonnan a ser ehekutá na e planta di tratamentu di awa di kloaka i e stashon di “booster”. Na momentu di entrega a traspasá e eksplotashon/operashon formal di EPB pa WEB.
Start proyekto di 10 EDF: Ekspanshon riol
Na 2021 WEB a kuminsá ku ekspanshon di e riol na Belnem i Hato i konstrukshon di un èkstra “vacuümstation” na Belnem (di 10 EDF). WEB ta kontentu ku por a kuminsá ku e ekspanshon, debí ku e kapasidat aktual di e sistema ta alkansando su máksimo, espesialmente na Belnem.
Riba 3 di yüni 2022 WEB a presentá e relato finansiero, deklarashon di accountant i relato anual na EPB. Riba 17 di yüni 2022 OLB a konfirmá e relato finansiero. Ku esaki WEB ta kumpli ku e términonan ku “Corporate Governance Code” di Boneiru ta eksigí.
WEB Boneiru a alkansá un resultado positivo. E resultado aki a keda alkansá prinsipalmente dor di un sistema di operá empresarial efisiente i e oumento imprevisto di kompra di awa i elektrisidat. Tambe a hasi un korekshon di un solo biaha riba kreditonan di nos departamentu di déposito (pa materialnan). Un resultado positivo ta importante pa WEB por kumpli ku e ratio di e finansiadó. Un sistema di operá empresarial ta nesesario pa WEB pa por finansiá e kresementu aktual i den futuro komo organisashon prepará pa un futuro duradero.
Na 2021 WEB a risibí supsidio di “Ministerie EZK & I&W” pa respektívo preisnan di elektrisidat i awa di bebe. Pa prosesá awa di kloaka WEB ta risibí un supsidio di “Ministerie I&W”.
WEB ta satisfecho ku kolaborashon di Konseho Ehekutivo, “Ministerie EZK, I&W i BZK”. Nan ta yuda nos pa alkansá nos mishon: kontribuí na salubridat públiko i un nivel di bida haltu na Boneiru pa medio di awa di bebe, suministro di koriente i proseso di awa di kloaka pagabel, konfiabel i duradero.
Pronto un vershon kòrtiku di e relato anual 2021 lo ta disponíbel pa download riba e wèpsait di webbonaire.com. Interesadonan pa mira e relato anual kompleto, por manda un petishon por eskríto òf via di meil. Por manda esaki na Kaya Gresia #6, Kralendijk òf manda un meil na: info@webbonaire.com.
