WEB ta kuminsá ku trabounan di konstrukshon na Hato

Kralendijk, 16 aprel 2020 – Water- en Energiebedrijf Bonaire N.V. (WEB) ta kuminsá den aprel ku trabounan di preparashon pa konstrukshon di e planta di awa nobo.

 Na novèmber 2019 WEB seremonialmente a hinka e promé skòp den tera pa e konstrukshon di e instalashon di desalinisashon huntu ku IDE Technologies (IDE). E instalashon lo produsí 5600m3 di awa di laman pa dia, ku teknologia avansá pa produkshon di awa di bebe pa nos isla.

E proseso di konstrukshon ta wòrdu repartí den 3 fase: trabounan di preparashon, konstrukshon di e instalashon i finalisashon di  henter e instalashon. Mei mei di e promé kuartal di 2021 e parti di instalashon tékniko lo ta kla pa pasa over pa e produkshon di awa di bebe. Den e di tres kuartal di 2021 e trabounan lo wòrdu finalisá.

Pa abitantenan den besindario ,e trabounan lo por trese molèster inevitabel.WEB ta hasi su máksimo esfuerso pa redusí e molèster mas ku ta posibel. E bienestar i seguridat di e abitantenan ta un prioridat pa WEB.

WEB ta keda invertí den suministro di awa, pa asina por garantisá suministro doméstiko i konsumidónan grandi riba nos isla. Apesar di e pandemia mundial, WEB lo sigui invertí den futuro di Boneiru i suministro di awa di kalidat.