Menu

U bent hier: Home » Koriente bèrdè » Registrashon i kùrmentu Instalashon di DG

Registrashon i kùrmentu Instalashon di DG

Bo propio instalashon di DG riba e ret di elektrisidat di WEB Boneiru? Bonbiní! Lesa aki e reglanan di wega i mèldu bo mes.

Kiko ta un instalashon di DG?
DG ta para pa ‘Distributed Generation’. Ta trata di instalashon desentral pa generá energia duradero (‘koriente bèrdè’) ku ta konektá riba e ret di elektrisidat. Na Boneiru eseinan ta instalashonnan pa energia solar i energia di bientu.

Dikon registrashon i kùrmentu?
Ta obligatorio pa registrá bo instalashon di DG na WEB ora bo ke konektá e instalashon riba e ret di elektrisidat. Solamente instalashon ku a kùr bon por konektá riba e ret. Semper mester kùr tambe ekspanshon di bo instalashonnan. Dikon? Pa bo i nos seguridat, i pa kontinuidat i kalidat di suministro di koriente.

Seguridat
Energia solar i energia di bientu no ta sin riesgo. Intenshon di e reglanan di konekshon i prosedura korespondiente inkluso kùrmentu ta pa evitá situashon peligroso.

Kontinuidat i kalidat
Pa kontinuidat i kalidat di suministro di koriente, ta nesesario pa WEB tin konosementu di e sitio i grandura di bo instalashon di DG.

Nesesidat
Pues un instalashon di DG ku a kùr bon ta nesesario – pa bo, pa WEB i pa Boneiru. Nunka no mag konektá un instalashon ku no a kùr bon riba e ret di elektrisidat. Si apesar di reglanan, bo konektá un instalashon ku no a kùr bon riba e ret, bo ta responsabel pa e konsekuensianan negativo di esaki.

Si WEB enkontrá un situashon asina, lo deskontinuá entrega di koriente.

Si a sigui e prosedura korektamente i a finalisá esaki ku éksito, ta konfirmá esaki entre WEB i e kliente den un asina yamá ‘Akuerdo di Interkonekshon di DG’. Ta obligatorio pa sera e Akuerdo di Interkonekshon di DG aki ku WEB. Ku esaki bo ta deklará ku bo ta di akuerdo ku e reglanan di konekshon i ta registrá e kapasidat instalá di e instalashon di DG. Despues di firmamentu bo ta bin na remarke pa e kompensashon di entrega bèk.

E prosedura di petishon

  1. Bo ta kliente kaba di WEB i tin un instalashon eléktriko. Riba esei bo ke konektá un instalashon di DG, òf bo ke legalisá un konekshon ya eksistente.
  2. Bo ke ekspandé bo instalashon di DG eksistente.
  3. Bo ta un kliente nobo na WEB pa un instalashon eléktriko ku un instalashon di DG.
  • Den tur tres kaso, bo ta obligá pa enbolbí un instaladó registrá. Tambe ora bo mes ta hasi e instalashon, un instaladó registrá ta nesesario pa e plannan rekerí i registrashon pa kùr.
  • E instaladó ta entregá WEB e dokumentunan rekerí. Ta trata di:
    • Formulario di registrashon kompletamente yená
    • Diseño di situashon
    • Plan di instalashon di e instalashon eléktriko i plan di instalashon di e instalashon di DG
    • Karchi di kùr di eventual instalashon
    • Spesifikashon tékniko di e instalashon.
  • WEB ta evaluá si e petishon ta kompleto. Ta sigui un asina yamá ‘estudio di integrashon den ret’ ora ta trata di instalashon ku un kapasidat mas grandi ku 13 kVA, i kaminda WEB ta haña nesesario: kiko ta influensia di e instalashon di DG riba tenshon i sobrekarga di e ret di distribushon den besindario? Si e ta influensiá konfiabilidat òf kalidat di entrega di koriente negativamente, e ora ei WEB por nenga petishon pa konekshon di un instalashon di DG riba e ret.
  • WEB ta kontrolá si e instalashon ta kumpli ku e reglanan di konekshon.
  • Si e petishon ta kompleto i WEB ta di akuerdo, e ora ei e instaladó ta pasa tuma e petishon i ta entregá e dokumentonan na Direktorado Supervishon i Mantenshon (DSM) di Entidat Públiko Boneiru. DSM ta hasi e kùrmentu tékniko di seguridat di instalashon di DG, meskos ta e kaso pa instalashon eléktriko.
  • Despues di risibí e dokumentashon, DSM ta planeá e kùrmentu i ta informá e instaladó i WEB ki dia e kùrmentu ta tuma lugá.
  • Den kaso ku no kùr e instalashon bon, DSM ta planeá un kùrmentu nobo ku e instaladó i WEB.
  • Despues di aprobashon, DSM i WEB ta firma e karchi di kùr. Despues di esei ta sigui firmamentu di e Akuerdo di Interkonekshon di DG obligatorio i ta kuminsá deskontá e kompensashon di entrega bèk.
  • Paga tinu! Ora di firmamentu di e Akuerdo di Interkonekshon di DG, bo tin ku entregá e karchi di kùr firmá òf un kopia di esei.

Detayenan kùrmentu instalashon di DG

Akuerdo di Interkonekshon di DG
Si DSM i WEB aprobá bo instalashon di DG, ta sigui firmamentu di e Akuerdo di Interkonekshon di DG obligatorio. Aki bo mester entregá e karchi di kùr firmá òf un kopia di esei.

Despues di firmamentu di e akuerdo, WEB ta pone un meter ku por registrá e entrega bèk di energia. Ta konektá e instalashon di DG riba e ret di elektrisidat i ta deskontá e entrega bèk di energia.

Entrega bèk
E kompensashon pa e energia ku entregá bèk na e ret di WEB ta parti di e Akuerdo di Interkonekshon di DG. Ehekushon di esaki ta poné den Lei Elektrisidat i Awa di Bebe BES ku for di promé di yüli 2016 ta na vigor.

Pa kliente partikular ku tin un konekshon ku un kapasidat di maksimalmente 13 kVA ta konta un kompensashon di entrega bèk di 5 sèn di dòler pa kilowatt pa ora. Pa kliente komersial ku un kapasidat di mas ku 13 kVA,e kompensashon di entrega bèk ta 1 sèn di dòler pa kilowatt pa ora. Ta stipulá haltura di e kompensashon di entrega bèk pa medio di un areglo ministerial. Ministerio di Asuntunan Ekonómiko ta stipulá e kompensashon di entrega bèk.

Paga tinu! Si e kantidat di energia ku entregá bèk ta mas ku e energia ku haña di e ret, bo no ta haña kompensashon pa loke ta mas. Ta kalkulá e kompensashon riba un periodo di mei aña, esta promé di yanüari te ku 30 di yüni i promé di yüli te ku 31 di desèmber. Por haña e teksto di lei eksakto den Lei Elektrisidat i Awa di Bebe BES, Kapítulo 4, artíkulo 4.1, insiso 3.

Informashon mas detayá por haña den Staatscourant (Areglo ministerial elektrisidat i awa di bebe BES).

 Mi por entregá bèk ku Pagabon tambe?
Nò. Klientenan di Pagabon no por entrega koriente bèrdè na e ret di WEB. E konekshon di Pagabon no por registrá e entrega bèk. Si tòg bo ke konektá un instalashon di
DG na e ret, bo por entregá un petishon na WEB pa kambia bo meter prepago di Pagabon pa un meter postpago. Kaba bo ta sigui e prosedura deskribí aki dilanti.

Mi ke bai off-grid ku mi instalashon di DG, esei por?
Esei por, pero tin kosto mará na esei. Si bo instalashon di DG tin un kapasidat di mas ku 14 kVA, bo ta obligá pa despues di deskonekshon di e ret, sigui paga WEB 5 aña largu e tarifa di uzo fiho.

Informashon i formulario di registrashon
Informashon tokante e kondishonnan di konekshon i e formulario di registrashon pa bo instalashon di DG bo por download aki.

Koriente bèrdè

Grátis Servisio di interupshon

Bo tin un interupshon? E tim di Servisio di interupshon ta alkansabel 24/7 via e linia grátis 9215