Menu

U bent hier: Home » Bo salú i seguridat » Koriente i bo seguridat

Koriente i bo seguridat

WEB ta responsabel pa entrega seif di koriente. For di e kashi di meter bo mes ta responsabel pa uso seif di koriente. Pa esei gustosamente nos ta duna bo algun tep i konseho.

Importante!

Preferiblemente laga un instaladó registrá hasi e trabounan na bo instalashon di koriente. Bo por haña un lista di instaladó registrá riba nos website www.webbonaire.com. Sino en todo kaso laga kontrolá e trabou ku a hasi. E instaladó registrá ta un spesialista ku ta kontrolá i evaluá trabou di un elèktrishèn òf di bo mes segun normanan stipulá.

Sa kiko bo ta kumpra

En prinsipio ta traha aparatonan eléktriko mas seif posibel. Nan mester kumpli ku diferente stándart internashonal. Tòg por tin aparato inferior riba merkado. Sa kiko bo ta kumpra!

Tep
• Ora bo ta kumpra, paga tinu riba marka di kalidat: eseinan ta garantisá ku un instituto internashonal a kontrolá siguridat di esaki.
• Preferiblemente kumpra aparato ku stèker ku grount. E stèker aki tin kòrtá ku strep di metal aden (sistema oropeo), òf tin tres punta (sistema merikanu).
• Mihó ta aparato ku isolashon dòbel. E kapa di isolashon èkstra ta pone ku ora tin defekto nan no ta haña koriente. Bo ta rekonosé e aparatonan aki na un ikono chikitu di dos firkant den otro.

Sa kiko bo ta hasi

Aunke bo kumpra e mihó aparatonan, waya, stèker i stòpkontakt: uso robes ta kondusí na situashonnan insigur. E dosnan mas konosí, ku lástimamente ta pasa hopi ainda, ta sobrekarga i korto sirkuito. Sa kiko bo ta hasi!

Sobrekarga i korto sirkuito

Ora tin sobrekarga ta pidi muchu koriente pa motibu ku ta usa hopi aparato eléktriko pareu. E wayanan di koriente ta bira muchu kayente pone e isolashon smèlt i bin korto sirkuito.

Korto sirkuito por sosodé tambe si un aparato òf waya ta dañá. E ora ei e núkleonan di koper di e wayanan di koriente ta bin den kontakto ku otro. Esei ta kondusí na un amperahe hopi haltu ku ta kousa kentamentu di mas i ku e wayanan ta smèlt.

Den bo kashi di meter, un fius ku ta bula òf un suich di grupo òf e interuptor outomátiko ku ta aktivá, ta kita koriente e ora ei. Bo ta haña bo e ora ei kompletamente òf parsialmente sin koriente te ora kita kousa di e korto sirkuito.

Tep
• No laga muchu hopi aparato ku ta usa hopi koriente traha pareu. Ta bai pa e ‘chupachupanan di koriente’ manera wasmashin, èrko, frishidèr, drayer eléktriko, mashin di laba tayó òf stòfzùiger.
• No konektá muchu aparato riba ún stòpkontakt, i pa grupo den bo kashi di meter, no konektá mas ku 1200 Watt. Riba e plachi di spesifikashon di bo aparato òf den e instrukshon pa uso, por mira kuantu Watt un aparato ta usa. Si tin duda, konsultá un elèktrishèn registrá.
• Semper tene bo mes na instrukshon pa uso di e aparatonan eléktriko.
• Kontrolá isolashon di e wayanan eléktriko. Un lugá hopi komun kaminda e isolashon ta daña, ta na e stèker. Sòru pa drecha e stèker, òf remplasá e aparato.
• Semper tene na e stèker ora bo ta sak’é for di stòpkontakt. No ranka na e waya, pasobra esei por daña e isolashon.
• No laga waya ‘pega’, por ehèmpel bou di porta òf material ku ta tapa flur. Semper sòru tambe ku a lòs wayanan kompletamente i ku nan no ta brua den otro. Asina bo ta prevení kentamentu di mas i gastamentu, ku ta kousa korto sirkuito.
• Nunka pega waya di elektrisidat ku klabu òf nit. Por kumpra klèm òf renchi spesial pa kabel pa pega waya na un manera seif.
• No usa waya pa kologá algu na dje.
• No usa mas ku un verlengsnoer entre un aparato i e stòpkontakt. Mas waya bo usa, mas grandi e chèns ta ku nan ta brua den otro. Tambe un kombinashon di verlengsnoer por pone bo konektá muchu aparato inkonsientemente.

Sòru pa grount

Ta importante pa grount spesialmente aparatonan di metal, manera wasmashin. Ora e waya di koriente bin den kontakto ku e metal, por ehèmpel pa motibu ku e waya a gasta òf e isolashon a lòs, e aparato ta haña koriente. Un waya èkstra (‘waya di grount) den e kabel di konekshon di e aparato ta prevení esaki: e koriente ta pasa bai den tera.

Ku e asina yamá ‘tera sirkuito’ aki, ta deskonektá koriente den bo kashi di meter komo ku e fius ta bula òf e interuptor outomátiko ta aktivá.

Si e waya di grount ta lòs òf no tin esaki, bo aparatonan ta sigui traha normalmente. Lástimamente ku hopi bes ta te ora tin fayo numá ta deskubrí grount robes: e koriente no ta bai i ta pone e aparato bou di tenshon. P’e motibu ei por tin kandela, òf koriente por dal e usadó. Esei ta peligroso pa bida di hende. Komo ku humedat ta bon konduktor di koriente, bo tin ku paga bon tinu spesialmente den lugánan húmedo manera baño i kushina.
Protehá bo mes, sòru pa grount!

Tep
• Pidi un instaladó registrá pa kontrolá òf instalá e instalashon eléktriko – bou di instalashon ta kai tambe konekshon di aparatonan.
• Paga tinu ku humedat. No pone kos di bebe òf un vas ku flor riba, òf direktamente banda di, aparatonan eléktriko.
• Preferiblemente usa aparatonan ku un stèker di grount i konektá nan solamente riba stòpkontakt di grount.
• Paga tinu: den lugánan húmedo manera baño i kushina, stòpkontakt i stèker di grount ta obligatorio.

Prevení daño pa motibu di mal tempu

Bo instalashon eléktriko bon di grount ta importante tambe ora tin mal tempu. Ora welek kai, bo aparatonan eléktriko por daño. Laga grount bo instalashon eléktriko i laga pone un interuptor outomátiko den bo kashi di meter. Si welek kai, e interuptor ta bòltu i ta kita koriente. Asina ta prevení daño!

Tep
• Bo instalashon eléktriko no ta di grount, e ora ei na momentu di mal tempu tuma e siguiente medidanan:
• Saka tur stèker di bo aparatonan for di stòpkontakt. Asina bo ta prevení ku e koriente di e welek ta yega na bo aparatonan.
• Deskonektá tambe bo telefòn, televishon i internèt.

Tene kuenta ku mucha

Mucha ta kurioso i movibel. Esei ta hasi ku koriente seif èkstra importante. Ta solamente algun medida tin ku tuma pa prevení aksidente i situashon peligroso: hasi stòpkontaktnan seif pa mucha, sòru pa waya i stèker ta bon isolá, i skonde wayanan òf pega nan bon. Kòrda riba muchanan!

Tep
• Buska stòpkontakt seif pa mucha. Nan tin tapa pa entrada di e stòpkontakt. E tapanan aki solamente ta move bai na banda si primi e stèker tur dos entrada mes duru. Pa bo esei ta fásil, pa un mucha esei ta hopi difísil.
• Bo por tapa tambe bo stòpkontaktnan eksistente. Pa esei por haña tapa lòs. Paga tinu: Nan no ta meskos pa stòpkontakt ku ta di grount i no di grount! Bo ta plak òf primi e tapa den e stòpkontakt. Pa medio di un mekanismo di fer e burakunan di e stòpkontakt no ta visibel si bo no ta usa nan.
• Saka stèker for di stòpkontakt despues di a usa bo aparatonan, asina e tapanan ta den posishon seif.
• Kontrolá regularmente isolashon di waya- i stèkernan. Un mucha no sa kiko ta isolashon malu i sin mas lo kohe un waya tene. E ora ei koriente por dal’e.
• Skonde wayanan di koriente mas tantu posibel. Bo yu por trompeká ariba òf keda pegá aden. Pasa wayanan kantu di muraya i patras di muebelnan.
• Preferiblemente usa algu pa pasa e kabel aden. Un otro posibilidat ta pa pega wayanan ku klèm na e plent.
• No laga waya kologá na haltura di mucha: esei ta un invitashon pa bai hunga kuné.