Menu

U bent hier: Home » Bo salú i seguridat » Drep ku tanki séptiko

Drep ku awa for di tanki séptiko? Bo ta hunga ku bo salú!

WEB tin biaha ta konfrontá kontaminashon di awa di bebe debí na konekshon krusá. Esaki ta e konekshon ilegal entre tanki séptiko i instalashon di kas di awa di bebe. Loke parse un solushon spardó di kosto ta un peliger pa salú públiko. Gustosamente WEB Bonaire ta splika bo e riesgonan di salú di un konekshon krusá. Tambe nos ta rekordá bo ku konekshon krusá ta prohibí.

 

Kiko ta un konekshon krusá?

Ta parse asina práktiko: usa awa for di bo tanki séptiko pa drep den kurá. Pero e awa for di bo tanki ta awa di riol no purifiká. Esei por ta un peliger pa nos salú. Nunka no konektá bo instalashon di awa di bebe ku bo tanki séptiko!

E konekshon krusá aki ta parse un solushon ku ta spar plaka, pero ta un peliger pa salubridat públiko. Tin un chèns grandi ku bo ta kousa kontaminashon di awa di bebe. No solamente den bo propio instalashon di awa di bebe, sino tambe den e ret di distribushon di awa. Por surgi un fluho di awa ku ta bini bèk, e asina yamá ‘backflow’, ku ta kontaminá e awa di bebe.

 

Kiko ta backflow?

Bo ta kòrda esaki ainda, e lei di tubunan komunikante (de wet van de communicerende vaten)? Den dos tubu ku ta konektá ku otro e líkido semper ta bai para mes haltu den tur dos. Ora e nivel (òf e preshon) baha den un tubu – bo tanki séptiko –awa lo kore sali for di e otro tubu – bo instalashon di awa di bebe.

Esei ta eksaktamente e intenshon, tòg? Si, pero lo kontrali ta pasa mes fásil: e preshon den bo tanki séptiko ta bira mas haltu ku den bo instalashon di awa di bebe i awa di riol ta kore bai bèk den bo awa di bebe: backflow.

 

Kon backflow ta kousa kontaminashon?

Ku e preshon den bo sistema di afvur ta bira mas haltu ku esun di bo sistema di awa di bebe, por tin diferente kousa: diferensia di haltura, uso di pòmp, òf uso intensivo di e afvur. E backflow ku ta surgi ta kontaminá e awa den bo instalashon di awa di bebe.

Siguientemente e kontaminashon aki ta yega den e ret di distribushon di awa. Esaki ta sosodé asina ku e preshon den e ret ta mas abou ku den bo instalashon di awa di bebe. Kon frekuente esaki ta pasa? Mas frekuente ku bo ta pensa – i podisé hasta ta ripará. Diferensia di preshon ta sosodé hopi rápido ora entre otro tin trabou di mantenshon, deskonekshon, òf si un kaminda inesperá mester di hopi awa, por ehèmpel ora di pagamentu di kandela.

 

Kada cross connection ta un riesgo pa salú – tambe pa esun di bo!

Kada konekshon entre tanki séptiko i instalashon di awa di bebe ta un riesgo pa salubridat públiko. P’esei segun nos Kondishonnan General 1992 no ta pèrmití konekshon di e instalashon di awa di bebe ku un otro suministro di awa.

WEB ta kontrolá konekshonnan krusá ku tèst arbitrario. Ta deskonektá violadónan i ta duna nan but; tambe ta kobra nan e gastunan di limpiamentu i eventual gastunan di reparashon i di daño.

 

Let’s do it together!

WEB ta responsabel pa distribushon di awa di bebe limpi na Boneiru. Bo ta asumí bo responsabilidat? Evitá ku bo ta bira un shushadó i tene bo tanki séptiko i bo instalashon di awa di bebe estriktamente separá. Tene nos awa di bebe limpi, pa bo propio salú i di otro hende!